人力成員「快必」譚得志早前因為一句「你阿媽」，就被民建聯嘅譚耀宗指控「講粗口」逐出政改公聽會，但其實如果講爛口，快必又算係啲乜啫。
話說前日答問大會開始前，有傳媒就喺拍攝泛民示威時，遇到兩名穿上黑色西裝、打黑呔，兼載上政府人員證件嘅疑似梁振英保鑣，喺示威進行時，喺立法會走廊一邊指住泛民議員，一邊不斷講「仆街」，連環爆粗影響記者拍攝。
該名受影響嘅行家好厚道，好客氣咁叫兩位阿Sir唔好再講粗口，否則粗口被攝入鏡兼播埋出街，搞到大家麻煩就唔好，兩位爆粗阿Sir亦識趣收口。唔知譚耀宗對住阿Sir講粗口會否一視同仁呢？