特首梁振英前日喺答問大會上示範萬能Key，表演將香港一切問題點樣歸咎於土地供應不足之上。藝人鄭中基似乎相當認同土地不足乃係萬惡根源，噚日佢喺facebook一句留言，瞬間獲得唔少網民認同，睇嚟梁振英真係要快啲解決土地問題。
鄭中基話，「如果唔係土地問題，我應該次X次中六合彩頭獎，講完。」（圖）雖然佢冇多作解釋，土地問題如何令佢唔可以次次中六合彩頭獎，但係短短一句留言，不足一日已經有逾2,900個like，證明唔少人認同佢講法。八方極度盼望梁振英快啲解決土地問題，等鄭中基表演點樣可以次次中六合彩頭獎，講完。