港股與A股已逐漸融為一體，港股A股化，無可避免。之前有記者問港交所總裁李小加，港股會否A股化，李小加答得妙，叫香港人不要「葉公好龍」，呢句成語點解，上網一查便知，不必細表，但即使葉公見龍不驚，都唔等於鍾意見到條龍擺尾，掃到股市七零八落㗎嘛，例如漢能薄膜、高銀與恩達呢三隻股，現今世界馳名，令香港股市成為監管大笑話，對香港作為國際金融中心確實係有損聲譽嘅，你估俾金融時報標籤香港股市為Gamble with care係好馨香一回事咩。
大勢所趨，中港股市透過滬股通，深港通，中港基金互認三大招數，正正式式鼓勵北水南下，水淹香江，加上非正式渠道老早已經從地下做咗好耐五鬼運財，民間銀紙來港源源不絕，試問香港七百萬人嘅GDP點夠頂？
呢日碰到一個金融集團嘅CEO，佢話港資券商賣盤俾中資券商，係遲早之事，內地券商恃住隨便有幾十萬客戶，股市旺之時（例如成交過萬億至兩萬億元人民幣，令紐約成交量額瞠乎其後），買香港公司幾乎唔駛問價，當買個名牌高價手袋而已。呢位CEO講：「上市券商賣殼有價，未上市券商就整好盤數，待善價而沽。野心大嘅就想與內地券商搞戰略聯盟，揮軍北上，但因財力與市場體積相差太遠，人地根本唔當我地係equal partner。」
OK，請歡迎新時代，大時代，香港國際金融中心好快在幾年內便是中國資本控制的金融中心，並無港資係一個major player，只會是中資撼美資，由華爾街大行香港分店抗衡內地資本。年青本地大學生想話進入ibank，如果淨係英文好，完全冇用，一定要精通中文，多啲閱讀中華人民共和國歷史及中國共產黨黨史（中文大學出版的，不是內地官方出版的）。今年求職季節最熱門嘅職位係A股分析師，美資大行與港資券商紛紛搶人，以迎接「大時代」，新亞師弟分析M幾醒目，年幾前就請定一位來自內地嘅中大碩士生（財務碩士）做A股分析助理，現在就係收成期。但呢行搵工跳槽係家常便飯，A股分析員嘅身價隨時三級跳，留人並不容易。