社交網路的出現，令廣告不再是傳統媒體的天下。中小企只要識得玩，分分鐘可以極低、甚至零成本成功上位。韓國化妝品店Here We Seoul成立僅兩年半，當初的6000元投資，現已變成過幾千萬資產，並正部署兩年後上市，老闆之一的黃英揚（Liam）表示：「識玩Facebook（fb），真係可以令你發達。」
Here We Seoul於2012年11月，由現時分別28歲之Liam與25歲拍檔楊沅宜（Livana）合共夾份6000元成立，「開始搞呢盤生意，第一件事係開商業登記，第二件事係開fb。」網店於fb起家，現時每月收入達7位數，按年增長10倍。雖然自公司成立後9個月，已開設自家網頁，並於去年先後於尖沙咀及銅鑼灣開設實體店，但現時仍有八成收入來自fb，「開實體舖係想俾客試下產品，暫時唔會再開啦，對我哋來講都冇咩用。」
事實上，網店於短短兩年半時間內，fb專頁已累積超過22萬Like。Liam指出，早於專頁成立之初，已開始於fb真金白銀落廣告，首三個月每月花約500元左右。「唔俾錢嘅Like，好多都係八掛入嚟，但俾錢嘅就真係中到我哋嘅Target，你見到啲留言同購買力差好遠。」
觀乎Here We Seoul的專頁，其中一個吸Like大法，相信是出動靚女老闆Livana親身試產品，有時甚至素顏上陣，拍片拍相樣樣齊。網店吸Like後，最重要的是將Like變錢。Liam舉例指，例如過去曾上載一段關於頭髮造型的影片，當下一次出一個捲髮器廣告時，我可以直接指定向那一班曾播放該段影片的用戶發出。
現時網店每月花約6位數於fb廣告上，同時亦有於平面雜誌落廣告，一方面建立品牌，同時為專頁吸引具消費力的流量，「我哋可以用比人低嘅價錢，去中晒潛在客戶，就係因為我哋識用Targeting功能。」然而，面對fb近年大幅降低Organic Reach（即非付費、自然經facebook現有方法令訊息接觸到用戶）比例，他認為此對公司相對有利，「當人哋唔敢掉錢落去，你敢掉就會贏。」加快汰弱留強的速度。
目前公司有約25名員工，下一步希望於兩年後於創業板上市，Liam指，現時專頁已不再以「谷Like」為目標，而是要將fb的流量，轉至自家網頁，「你生意嘅核心係個網頁，但fb係你最強嘅手臂，冇咗佢你唔會死，但你會得返一兩成功力。
記者:倪敏慧
攝影:羅君豪 李潤芳