日本女星藤原紀香日前被爆搭上有份演《半澤直樹》嘅歌舞伎男星片岡愛之助，男方仲去紀香家中連過兩晚。但事件搞出個三角關係，片岡奀星女友熊切麻美死口話同片岡未分手，仍然同居。仲有消息話熊切嘅住所依然由片岡交租。有資深藝能記者話，睇嚟係片岡偷食，佢同紀香只係床上嘅朋友，相信二人唔係正式拍拖！
到咗昨日又有好戲睇，紀香同熊切竟然喺唔同嘅節目中爆喊。紀香同阿爸細佬上咗富士台一個節目，阿爸話希望佢搵個好男人再婚，紀香話知道阿爸好擔心佢，講講吓就忍唔住喊，大打溫情牌。而熊切昨日亦現身日本NTV台節目受訪，講嘅都接受雜誌訪問嘅一樣，都係堅持話相信片岡，仲話片岡從來冇話過同佢分手，又係即刻爆喊。
撰文：李村姑