金融界立法會議員吳亮星面不紅氣不喘咁話，過去幾千年都係阿媽幫你揀埋老婆，用以夾硬撐有篩選嘅政改方案。佢噚日又爆金句，喺立法會特首答問大會上，講講吓經濟發展，忽然話：「我諗香港市民既係需要民主，但更加需要嘅係銀紙。」
吳話立法會拉布對經濟造成好大阻力，舉例金發局成員要用自己資源去工作，稱政府是否要再就拉布作出評估。特首梁振英回應指「拉布呢個問題，社會已有公論」，又話過去幾個月，拉布的情況有所收斂，相信受社會輿論壓力所致。公共專業聯盟莫乃光會後忍唔住鬧吳亮星，話佢作為零票當選議員，憑乜代表港人價值觀，就係佢呢班特權階級「銀紙落晒佢袋，袋住先就袋晒」。