兩年前，銅鑼灣天價租金屢創新高，換來世界第一，但隨着零售市道走下坡，當年以天價承接貴租嘅名牌店捱唔住。新民黨葉劉淑儀話，銅鑼灣希慎道新英記茶餐廳兩年前不敵月租加到40萬敗走，由澳洲名牌手袋頂上，但原來名店今年已靜悄悄結業，至今舖位招租無人問津，葉劉呼籲業主應該租番畀茶餐廳，等市民有啖好食，如果成功爭取，可能都係一項政績。
地段唔啱做零售
葉劉噚日喺facebook話，屹立銅鑼灣逾20年的新英記茶餐廳，2013年7月因為捱唔住天價租金而結業，由澳洲名牌手袋Oroton承租，唔知係咪風水差，葉劉都話，民間智慧真係不能不信，皆因當時街坊已斷言，該地段打破唔到歷史宿命，從事零售「無好下場」，即使名牌都係咁話。
點知一語成讖，名牌手袋擺檔唔夠兩年，已經結業，近排舖位貼滿招租廣告。鄰店售賣英國名牌手袋的Cath Kidston亦都搞緊Bye Bye Sale，可見呢個位真係唔啱做零售。葉劉話，當年新英記大件夾抵食，結業時，佢同老闆娘鄧小姐合照，仲同佢講：「做得咁辛苦，不如就此退休算了。」葉劉話，既然附近冇地方方便街坊兼打工仔女醫肚，業主應該做吓好心以合理價錢租番畀茶餐廳等地道食肆，等市民有啖好食。
李八方
mailto:[email protected]