在中環遇到樓神C，佢鬼咁風騷講賣樓。呢輪一手樓市場旺，賣樓好似賣餅，對樓神嚟講，直情係a piece of cake，兩三日內就一Q清袋，而且佢仲預期下半年樓價會繼續上揚5%至10%㖭。
乜唔係三月份新樓動工量創七年新高，未來兩三年每年落成樓盤超過兩萬伙，創十七年新高咩？有咁多供應，樓價與樓宇需求何解仲會上升？樓神C話：「數字就係咁睇，唔會呃人，但我地在前線賣樓，日日見到真金白銀，實牙實齒咁湧入嚟買樓，一啲仲話要一次過俾晒幾百萬現金，一啲又話盡量俾多啲首期，例如去到五六成，借少啲按揭，當然亦有人要借埋二按嘅，但總體嚟睇，香港真係有好多人藏埋不少錢，買樓毫無困難，呢啲情況我地體會得多，反而啲政府官員與地產分析員──包括埋大學學者──只係睇政府提供嘅家庭入息數據，成日以為香港市民買樓買唔起，樓價過高等等。嗱，我地賣樓，腳不離地，亂開高價就賣唔到樓嘅嘞，啲紙上專家與官員就雙腳離地，不懂民間實況！」
樓神未必係賣花讚花香，事實上，綠表（公屋居民）買居屋，可以一炮過交315萬元現金買，潛在購買力係幾驚人。公屋戶有不少富戶，交稅少，租金平，每月儲錢比中產白領更易、更多。如果淨係睇統計署嘅家庭中位入息數字，肯定會睇錯市。
富二代劉鳴煒叫青年慳啲使，月儲三千元，被網民嘲諷，劉鳴煒當然唔駛儲錢就有豪宅住，但佢所言唔係錯嘅噃，投資者先要講資本，資本從何而來？如無父蔭，第一筆錢都係靠儲蓄嘅啫，雖然萬事起頭難，青年人還是要從儲蓄開始，儲夠一兩萬元就要買股票，銀紙放在銀行實在冇鬼用，不妨揀一啲「月供股票」計劃，過往供滙豐有着數，現在揸住滙豐就得個喊字，如果未來目的係買樓，就不如每月供地產股如長實地產、新鴻基地產，或買Reits，如樓價長升，呢類股票亦會長升，起碼係even chance，乜股都唔信嘅話，就每月儲錢買盈富基金，如信任「黨的智慧和力量」，就買恒生H股ETF，一於去少啲日韓台泰、買少兩對靚波鞋，十年後就知道有好處，成功要靠苦幹㗎。樓神聽到呢句話，又取笑左丁山離地：「我在售樓處得知，成功係要靠父幹，不少年青男女買樓，帶埋父母嚟寫支票俾首期㗎！」