每逢季尾總有唔少球隊有人事變動，不過對剛被皇家馬德里請食無情雞嘅安察洛堤（肥安）嚟講，真係唔算係好選擇。既然據報都收到皇馬600萬歐元（約5,000萬港元）賠償，加上之前幾年搵埋唔少，一把年齡梗係休息吓，睇定啲未來一年變化先再出山。
唞一年睇定再揀好過
肥安之前吹到好實，講到貝老同加里安尼力邀佢去AC米蘭。喂！你當肥安真係老懵懂？貝老仲有鬼心機搞波咩，個女就淨係吼住啲俊男球員，AC同蜜蜂先生嘅賣盤交易拉拉扯扯緊，國內好多陰謀論話買AC背景資金其實嚟自強國。唔理你哋信唔信，反正我就信，習總一聲令下要搞好足球，強國13億人民自然齊聲響應，電視台紛紛籌備足球神劇，仲打鬼子？out晒啦，有傳某電視台想拍足球穿越劇，講宋代蹴鞠天才去到現代，仲唔知點解去到英格蘭，最後成為英超球星㖭！
據聞電視台想搵貝克漢姆，sorry，叫大家聽唔慣，都係講番碧咸，呢位萬人迷客串。
另外，又有電視台想搵「細哨」朗拿甸奴客串㖭，之前連卡卡都幫強國賣潤喉糖廣告，強國勝在錢多嘛；而且強國開口埋口都一路一帶同亞投行，又有咩好得過買一間意大利老牌球會，幾個億，使得過。
所以肥安靜養一年，等AC變天先出山都唔遲，到時有人民幣又好，歐羅又好，應該多錢過問貝老拎。肥安連阿巴、佩雷斯呢啲老闆都搞得掂，又點會耍唔掂習總。
文：牽牛