唔經唔覺,中移動(941)董事長奚國華已經主持咗4次周年股東會,由初頭因為盈利增長放緩而俾小股東「問候」,到噚日股東會上不時聽到笑聲,都算係對奚總嘅一點肯定。
睇番呢幾年中移動嘅股價,由60、70蚊升番上嚟,近期變番紅底股,小股東當然高興。最重要係,即使小股東對住奚總狠批,佢仍然耐心解答小股東問題。
好似噚日公司原本話預50分鐘畀小股東提問,點知一問就問咗個幾鐘,搞到獨董羅嘉瑞都要中途走先,唔走尤自可,羅醫生一走,馬上被一名小股東點名。
呢位小股東唔係鬧羅醫生,而係批評中移動喺股東會只送一張電話卡畀小股東,西餅都冇件,仲話:「去羅嘉瑞間公司開股東會(唔知鷹君(041)還是冠君產業信託(2778)),都有4件、4件西餅送啦。」羅醫生如果聽到都唔知畀唔畀反應好嘞!