一個月左右之後就係政改決戰時刻，劇情會否峯迴路轉，還看5.31議員上深圳同京官面談之行。泛民主派都形容今次係向京官反映港人訴求嘅最後機會，為免大家對呢次深圳之行抱不必要嘅期望，花生友將近日所聞同大家分享吓啦。
泛民有心坐低傾
先講泛民嗰邊。今次去深圳前，泛民有過細心嘅討論，譬如達成唔帶示威物品入場嘅共識，原來佢哋當中有人一度諗過帶條橫額入去，但係大家考慮到唔想畀特首梁振英、建制派以至北京有口實，鬧泛民又再玩嘢，所以決定橫額都唔帶，就連稍為會令班京官覺得侮辱性嘅嘢都唔拎。目的就係向外界證明，今次泛民北上係堅有心坐低傾。
有泛民中人仲同花生友講，真係肯傾的話，當時15個獲專家認可符合國際標準嘅方案都有得傾，就連15個方案中、由親建制學者何濼生提出嘅方案都可以傾，當然前提係班京官肯傾先得喇。
不過另一邊廂，花生友綜合北面吹過來的風就發現，似乎呢次深圳之行係乜都冇得傾，事關北風形容上面已經作緊政改通過與否嘅兩手準備，同時相信到深圳之行當日，響遍五洲賓館嘅，只係人大決定不能撼動呢類耳熟能詳嘅說話。難怪噚日立法會答問大會上，特首梁振英都一改上月好有信心嘅講法，轉為話如果政改否決，希望未來擺低政改爭拗喇。
花生友