神奇的A股，總有啲神奇數字，讓股民刻骨銘心。如果股民心水清，將今年至今的滬綜指走勢圖同2007年同期對比，就會發現簡直一模一樣。咁當年的「530慘案」會否重演？有人話，今年5月30日係禮拜六，所以會冇事。但點知慘案昨日提前上演，滬綜指插水近7%，始終難逃一劫。
八年前的A股大時代，滬綜指由上年起狂升，至5月已升穿4000點。5月30日凌晨，財政部突然宣佈將股票印花稅由千分之一提高到千分之三，結果滬綜指全日跌7%，之後仍未止瀉，一個禮拜內挫近千點。
除了匯金減持內銀，昨日內地股市其實沒有任何實質性利淡消息。中證監例牌在周五新聞會講政策，A股今日仲有一關要過。如果真係跟足2007年走勢，滬綜指插水後有機會再上6000點，但結局如何，大家都知。
黃尹華