工業股殼王高振順擔任主席嘅瑞東（376），獲大孖沙馬雲旗下嘅雲峰基金入主，由3月中4蚊去到4月20日停牌前嘅9蚊升咗125%。高生旗艦精電（710），市值先得瑞東一半，精電殘到痹！
精電喺超級牛市底下，一年累跌20%，得21.4億元市值咁大把。高生相關兼任執董嘅主板股份光啟科學（439，前身英發國際），同期一支箭升咗11倍，市值181億元，係精電8.5倍。上邊嘅瑞東，亦係精電兩倍嘅市值。
高振順揸旗惹遐想
精電嘅市值細奀到不得了，而總發行嘅股數，得3.3億股，亦唔多。再講，呢期瑞東引入超級大孖沙，喺高生人脈激強情況下，精電會唔會步瑞東之後塵，引資大孖沙變身？呢吓好有遐想。
又排除呢個可能，高生係擔正精電主席兼大股東，精電萬千寵愛，遲早俾強勢大股東湊大。精電主打業務係生產中小型尺寸液晶汽車顯示屏，歐洲同祖國市場份額最重，達到總營數80%。
根據歐洲汽車製造商協會嘅數據，今年頭一季，汽車銷量364萬輛，增加8.5%。又按中汽協嘅數據，祖國今年第一季汽車產、銷量，都超過600萬輛，同比增加5.3%同3.9%。精電兩個重要營銷地區嘅汽車銷售數據，好靚仔，有個好開始。而著名機構Fourin預測，今年全球汽車銷量，會突破9,000萬輛大關，增幅近4%。
食住個勢精電主打瓣數有運行，加埋集團今年頭出售非核心資產，獲利5,000萬元（等於精電上年盈利20%）計數，估今年EPS增長24%，到0.95元，精電現價（6.56元）得6.8倍預測PE，加埋6厘高息，流晒口水。乜都唔當買呢個超靚仔嘅數據，精電翻半番到9.75元，PE先得10倍，市值都係講緊31億元。
錢雋
細價股專家
本欄逢周一、三、五刊出