嚟到季尾，唔少教練都同球會分手，最大名嘅有安察洛堤同高路普。究竟佢哋去邊度最適合？小弟幾鍾意高路普呢個教練，夠激情，呢幾季帶多蒙特嘅踢法又好睇，都希望佢快啲搵到一個新舞台。
作風不合急進皇馬
睇番高路普嘅履歷，佢係一位鍾意長期執教、慢慢砌隊波嘅主帥。2001年佢開始喺緬恩斯教波，留咗七年先走，去教多蒙特。之後佢又喺多蒙特留七年，到今個夏天走人。
喺頭兩季教多蒙特嗰陣，高路普其實冇獎盃，係用時間嚟建立佢嘅陣容，例如帶蘇保迪過檔，買斷曉姆斯，收購主力射手巴里奧斯。默默耕耘兩年，多蒙特先正式崛起。因此，如果教皇家馬德里呢類要即上任、即見成績嘅球隊就唔太啱高路普嘅風格。
相對而言，英超幾支強隊嘅班主就較有耐性，普遍一兩年冇盃都唔會郁你。小弟幾想高路普去做雲格接班人，等雲格安心退休，因為阿仙奴班球員後生當打，韋舒亞、艾朗藍斯同高基連，仲有阿歷斯山齊士都好跑得，相信可以發揮到高路普嘅戰術。雲格帶阿仙奴咁耐，華麗就夠晒，但係節奏較慢，希望高路普可以改善到呢點。
原本諗住就咁收筆，但有朋友就話小弟大整蠱，想整死高路普。朋友話君不見莫耶斯接班費格遜係幾咁大壓力，接替一個傳奇領隊好容易引火自焚，最好係頂替一啲成績麻麻嘅教練，咁球迷同高層期望冇咁高，會好教好多。咁講法，高路普去利物浦應該會幾舒服。文：咖喱