周三歐霸盃決賽，西維爾成功冧莊，喺波蘭華沙球場對住烏克蘭嘅迪尼普以3:2贏波封王，成為改制歐霸盃後首支衞冕球隊，四度奪標亦創咗新紀錄。更實際嘅係，佢哋捧盃後仲獲得下屆歐聯分組賽席位，所以下季將會有五支西甲隊參賽。
西維爾喺上周六西甲煞科戰贏波，但都過唔到第四位嘅華倫西亞；雖然聯賽冇前四，依然有另一個爭取歐聯參賽資格嘅機會；事關今屆開始，歐霸盃冠軍可獲之後一屆歐聯分組賽席位，好過喺聯賽拎第四要踢附加賽。周三歐霸盃決賽對迪尼普，西維爾喺開賽七分鐘就失守，不過到28分鐘由基祖華克同卡路士巴卡先後建功，用咗三分鐘就反超前。迪尼普喺完半場前由洛坦主射罰球扳平2:2，不過西維爾始終技高一籌，卡路士巴卡喺73分鐘射入奠勝一球。
近10年內五贏歐洲賽
西維爾喺2006同07年贏過歐洲足協盃，改制為歐霸盃後，佢哋喺近兩年兩度稱霸，至今四次封王，超越咗祖雲達斯、國際米蘭同利物浦，成為捧盃次數最多嘅球隊。加埋2006年嘅歐超盃，西維爾喺近10年內五次贏歐戰錦標，實在係勁！事實上，西班牙球隊喺歐戰真係佔壓倒性優勢，呢10年加埋贏咗16個冠軍，如果巴塞隆拿喺下月歐聯決賽大熱捧盃，就會再加多一個。
西維爾喺今季有完美結局，有傳教練艾美利會喺今夏走人，但佢賽後就唔肯透露去向：「呢個係好特別嘅時刻，感謝所有塞維利亞市民同球迷嘅支持。𠵱家我哋唔需要諗太遠，應該先好好為奪標慶祝。」梅開二度嘅入球功臣、哥倫比亞前鋒卡路士巴卡賽後話：「我將勝利獻畀神同埋喺哥倫比亞嘅家人，可以喺決賽入兩球實在冇得頂。」
迪尼普首次打入歐戰決賽，可惜失望而回，教練馬基夫治只可以嘆句輸經驗：「我哋後防出現太多失誤，畀卡路士巴卡喺鋒線有太多機會。西維爾明顯喺經驗上勝一籌。」
西維爾四次打入歐洲足協盃同歐霸盃決賽，全部搞掂奪冠，不愧為歐霸盃之王。不過，佢哋下季就未必再喺呢個賽事出現，因為會連同今季西甲前四名球隊，齊齊進軍歐聯。
識睇，一定係睇足英台【英波Live】：
http://soccer.appledaily.com
http://bit.ly/engballlive