今個球季完結，每次完結時都有種失落嘅感覺，當中原因包括：
1.之後兩個幾月嘅星期六日晚有咩做？
2.再冇一個藉口同朋友睇波吹水！
3.剛睇波時已「日日見」嘅球星離開，下年再見唔到佢哋！
4.自己支持嘅阿仙奴終於升到第三位，不過要成為聯賽冠軍，始終欠穩定性（不過對阿士東維拉希望有英足盃落袋）。
今季對一句說話特別有感覺：「其實球季年年都有，今年唔得咪下年嚟過！」季尾同一位支持咗利記十幾年嘅朋友傾偈，佢話有時支持一隊波，可能係因為球隊入面嘅某個組合，好似好多人支持巴西係因為3R好波；鍾意皇家馬德里係因為六條A；曼聯係因為七小福等。的確聯賽每年都有，但人就未必每年都一樣。好似謝拉特始終都贏唔到聯賽，對好多人嚟講都係一個改變不了嘅遺憾。「過咗讓它過咗」，就算將來利物浦贏到聯賽，都會係冇咗神奇隊長嘅利物浦。意義上，對由謝拉特時代開始支持利記嘅人，絕對唔係「年年都有」吧！
我自己係近幾年先睇阿仙奴，其實我支持阿記主要都因為雲格（中），當時覺得佢嘅堅持同主張好有個性，好希望雲格可以打敗摩連奴。如果雲格退休前都未能再贏聯賽同擊敗摩連奴，對我嚟講，可能都係一份遺憾。
今個星期日，我一定會支持阿仙奴再贏多次英足盃，超越曼聯成為贏得最多次冠軍嘅球隊。3:0雖然係個大比數，但我對阿仙奴每個球員都好有信心，你哋一定做到！
LULU
不懂踢波愛睇波