【鳩嗚乜乜乜】
《復仇者聯盟》系列電影全球票房高收，每次同各大商業機構合作推出嘅產品都保證有市場，今次旋風捲到手機界。三星最近夥拍Marvel推出復仇者系列手機，頭炮係鐵甲奇俠（Iron Man）限量版Galaxy S6 edge（圖）。
＃限量388部
部機6月喺香港開售，限量388部，外殼用Iron Man嘅紅金色為主，仲附送造型相配嘅無線充電板同專用透明保護殼。部機嘅功能同普通版Galaxy S6 edge無異，但限量版嘅儲存量只有64GB可選。講明限量版，售價當然唔普通，每部盛惠8,888元，貴過普通版大概千五蚊。
想買番部特別版都唔容易，首階段只畀Samsung ClubS特選客戶申請，名額100個，先到先得。到6月15號第二階段，就可以上網登記同抽籤。坊間對於部機就毀譽參半，有人講笑話拎住部金色版S6 edge下載個一模一樣嘅佈景主題，望落其實差唔多。聽講下一波會推出美國隊長，之後應該仲有雷神同變形俠醫版本。
費清
＃要生計，也要生活 ＃毋忘初衷