【亞視倒數之寄望轉型】今日是亞視58周年台慶，自4月行會否決亞視續牌，亞視玩完已進入倒數階段，銀根短缺，營運越見困難，執行董事葉家寶日前才說過想揀亞視台慶日執笠，將生死忌歸納同一天，讓它光榮結業。但家寶最近轉口風指亞視有不死空間，最大喜訊莫過於今日員工準時有糧出。
撰文：比華利
過往亞視台慶必敲響鑼鼓大肆慶祝，三年前甚至移師北京舉行晚會，尾段藝人又騎呢向空凳掟壽包，亞視與壽包從此結下不解之緣。記者日前約執董葉家寶做獨家專訪，帶了壽包和香檳為亞視預祝牛一，他見到一枱道具即雀躍說：「我使唔使掟壽包？」
難忘林百欣時代
靈魂人物家寶為亞視生日許願，他高舉酒杯誠心說：「希望苦盡甘來，前景明朗化，亞視繼續長壽。」樂觀的家寶堅信亞視不死：「我唔認同呢個係亞視最後一個台慶，佢只算亞視免費電視牌照嘅最後一次台慶，近排我哋接觸咗新買家，傾得成就有轉機，亞視免費電視時代終結，亞視可以變成網絡電視台，甚至製作公司，佢有不死發展空間。」
面對亞視這爛攤子，家寶有黯然，但不傷感：「冇牌已成事實，但亞視過去的確陪伴香港人成長，係大家集體回憶，今年台慶我哋就用紀錄片形式緬懷過去光輝歲月，同時展望將來。」即使贈興送上改歌詞的《零時十分》，家寶喃喃低唱後說：「唔使咁傷感。」事後還來一句「Happy Birthday ATV」。亞視公關部昨更證實，全體員工今日可以透過銀行自動轉賬收到5月份薪金，終於準時出糧，算是台慶帶來的喜訊。
家寶支持為台慶炮製慳皮個半鐘特輯贈興，他說：「唔浪費、唔鋪張，唔使錢嘅慶祝，用有限資源送觀眾一個紀念。」回顧過去台慶，家寶最難忘林百欣時代在新光戲院搞過的台慶頒獎禮。
恨做主播報新聞
亞視七朝元老的家寶自爆曾為亞視灑下男兒淚，他說：「99年封小平出現，亞視改新制，解僱咗好多人，我大假後返嚟真係收到信，我當時眼淚就流咗出嚟。自問過去為公司不眠不休，唔計較全力以赴，點解落得咁嘅結局，咁無情，我又冇犯錯。」
及至05年，家寶輾轉重返亞視，他並決定留守到最後一刻，有想過將來執包袱後路嗎？他說：「朋友話我呢期好紅，提議我去做議員，我又突然又諗係咪可以試吓從政，或者去教育界做培訓工作。」家寶近日甚至撈過界為新進唱作歌手INK的MV客串，扮演酒吧老闆，何不索性轉到幕前做藝人？他卻說：「我喺MV表現好生硬，得50分。」家寶再爆料有主播夢：「我好恨報新聞，有諗過叫新聞部同事畀我試，但怕俾人話我搞搞震。」
