韓國綜藝節目《Running Man》人氣主持李光洙日前嚟咗香港，噚日先俾人發現佢去咗波鞋街。今日上晝佢再喺朗豪坊現身，下晝就去咗柴灣工業城，同熊黛林（Lynn）一齊拍嘢，大批學生妹聞風而至。
三度出手護花
據知，光洙今次嚟香港係同Lynn一齊拍湖北衞視節目《如果愛》，而噚日氣溫雖然高達30度，但光洙依然着住長袖牛仔褸，雙手就捧住個紙皮箱，而Lynn就以平底鞋加背心連身裙出現，之後兩個上咗柴灣一座工業大廈繼續拍攝，到近6點就由10幾個工作人員護送佢哋離開。因為門口實在有太多fans，光洙全程出手護住Lynn，以免佢俾人撞親。
之後光洙同Lynn馬不停蹄，一齊坐咗開篷巴士去中環金紫荊，期間有強國大媽因為爭影相而跌到，光洙再男神上身扶起佢。無耐佢哋再去到中環摩天輪拍攝，有韓國工作人員一度同香港媒體發生爭拗，最後由光洙示意大家冷靜。至晚上8點幾，光洙返到迪士尼酒店即有大批女fans衝上前，佢非常nice咁同佢哋合照，又握手又攬，仲有瘋狂fan箍實佢條腰，直頭當佢老公咁樣！
撰文：馮仁昭
