A股連日升完再升，阿爺惟有直接灑水降溫，匯金減持、降低兩融槓桿，人行定向正回購，今次真係嫌一招唔夠力，出夠三招，滬深兩市嚟個股災，兩市各跌超過6%。阿爺要個市慢牛嘛，失控自然要調吓，股市調控分分鐘變新常態。
早前富時公佈將A股納入富時羅素指數，初始權重約為5%，當國際投資者可全面進入A股之後，權重將增至32%。不過，投資者似乎更加看重MSCI下個月係咪將A股納入指數。
事實上，A股納入MSCI嘅討論已經唔係第一次，舊年都已經傾過吓，最後拒絕咗，但係仍然保留A股喺個審核名單上，到今年例會再傾過。若果A股納入MSCI新興市場指數，將會引發基金追貨，大量資金將流入A股。不過，這亦是部份外國基金不贊同將A股納入MSCI的主要原因。目前恒指成份股的市盈率只有約12倍，滬綜指則23倍，納入A股將迫使基金不得不以高價買貴貨。
當中涉及不少技術上，以及海外資金自由出入等問題，中證監早前指，有關部門仍需完善QFII制度，優化滬港通，研究推深港通等等，以目前情況而言，下個月成功納入機會不高，隨着中證監積極推動，相信納入MSCI只是時間問題。
流氓