英超球季結束，贏得冠軍嘅係車路士，亞軍曼城，季軍阿仙奴，殿軍曼聯，第五名係熱刺，利物浦第六。翻查去年球季開始時，本欄於8月24日講車仔曼城爭英超，當時只睇完第一周賽事，就大膽預測冠軍係呢兩隊之爭，阿仙奴排第三，利物浦排第四。現在塵埃落定，知道當日預測前三名完全正確，只係睇低咗曼聯領隊尹高爾嘅功力，可以帶領曼聯力壓熱刺與利物浦，呢三隊嘅陣容其實差唔多，只係利物浦領隊羅渣士係水皮啲，失去蘇亞雷斯之後，浪費所得轉會費七千五百萬英鎊，亂咁買埋幾個明顯係二流嘅球員，攻不銳，守不穩，前鋒史杜列治傷患纏身，新加盟戰將完全唔係嗰皮，最後一場仲要大敗一比六輸俾史篤城，如果左丁山係利物浦班主，季末會首先考慮炒咗羅渣士，大力利誘西班牙馬體會嘅亞蒙士或多蒙特嘅Klopp做領隊。
車仔領隊摩連奴在葡甲、英超、意甲、西甲都贏過聯賽冠軍，運用戰術靈活變通，又知人善用，無可懷疑係英超第一人，下一季車仔仍然係英超頂頭大熱門，曼城領隊柏列基尼有時過份保守，冇乜靈氣，手下戰將年紀亦老，難有突破咯，阿仙奴一貫作風，花巧有餘，硬度不足，每每對住大球會就會輸波，有雲格在，阿仙奴就係咁嘅咯，反為曼聯有錢有野心，尹高爾亦係高手，下一季可能有力威脅車仔。
英超最遺憾之人，可能係謝拉特，佢自1997年成為利物浦正選後，至今十八年，成為利物浦靈魂，曾有機會加盟車路士，亦因為出於忠心，不願離開利物浦，可惜吖，利物浦18年來未試過拿下英超，上季適值蘇亞雷斯打出神級水準，有機會創下歷史，卻因為謝拉特對車仔時於重要時刻跣腳犯下大錯而輸波，斷送錦標，今季謝拉特明顯老退，身心俱疲，未試過踢出一級水準，兼且過早承諾加盟美國LA Galaxy，心情似乎唔集中，曾被羅渣士棄用。一代名將，如此黯然與英超告別，球迷實在傷心。與謝拉特相反嘅，係年紀相若嘅泰利，前季被打入冷宮，摩連奴竟有魔法，刺激到呢位老將完全恢復舊觀，係歐洲最佳中堅之一，摩連奴話：「冇我，泰利會被炒魷，若我冇泰利，車仔未必贏到冠軍。」高手出口，零舍唔同，手下無不悅服，摩連奴最識得利用老將帶動新人，新舊和諧結合，羅渣士呢位新紮領隊，有排未學得到。