滙控（005）今日飽受洗黑錢及私銀逃稅等醜聞困擾，光環不再股價低沉，肇事禍端，不少中外媒體都分析，是前大班龐約翰時代（1998至2006年任滙控主席），三項致命收購所造成。呢位爭議性人物，原來噚日喺香港，現身瑞房（272）股東會上，仲坐喺主席羅康瑞身邊㖭。
今年已73歲嘅Sir John，自獅子行退休後，鮮再公開露面，噚日股東會現場，似乎唔多股東認得佢，又或者瑞房小股東無揸滙控，感受唔深。
據聞龐老係「上海姑爺」羅康瑞老友，自06年起擔任瑞房獨董，過去亦經常來港開股東會，在港亦置有豪宅。
有小股東噚日影低佢坐喺台上嘅照片，佢一貫風度翩翩，不過就無好似獅子行時代、滙控大班例必着條子西裝恤衫配袋巾嘅英式作風。