香港人由細飲到大嘅維他奶（345），除了平日會在廣告sell溫情外，公司其實對本地活動都幾支持，好似旗下嘅VLT檸檬茶，已經連續第二年贊助本地賽車手歐陽若曦，出戰澳門格蘭披治賽。
維他奶香港行政總裁（CEO）齊松噚日現身記者會，仲特登打一條黑白格仔呔，十足十賽車比賽衝終點時支旗仔，唔講仲以為係為今次贊助活動度身訂做㖭。齊松話，查實條呔係佢今年年初去意大利米蘭旅行嗰陣買嘅，佢話一見到呢條呔，就諗起維他奶舊年第一次贊助歐陽若曦，覺得好有親切感，所以即刻入手，今年冧莊贊助，自然打呢條呔出嚟見人，應晒景。
齊松本身喺一名車迷，佢舊年都有親自拉大隊過大海支持歐陽若曦出賽。佢話今年亦計劃去撐場。