學民思潮召集人黃之鋒，年紀輕輕已經勁到被大馬政府拒絕入境，當地華文《中國報》更以「給一個理由好嗎？」起題做新聞，大馬人都連番嘲笑自己嘅政府，區區大國竟然怕咗一個小朋友，真係羞家。件事未完，之鋒噚日話，《中國報》記者事後向他傳來幾個問題，請之鋒回答，之鋒睇完咗其中一條問題，企咗喺度唔識答，更即時要喺facebook搵網民幫手。
之鋒喺佢嘅facebook上載咗呢條問題，佢話問佢嘅記者聲稱只係「趣味題」，內容係咁嘅：「假設，在路上碰到毒蛇、中共和大馬極權政府，要先打死哪個？」平時答慣記者問題嘅之鋒即時呆咗，唔知佢問嚟做乜，完全回應唔到。
彭志銘：好小學雞
之鋒嘅facebook朋友即時熱烈討論，次文化堂社長彭志銘話，呢條問題好小學雞；民權觀察成員沈偉男話，建議之鋒以「叫毒蛇打死中共同大馬極權政府」做回應。不過最吸睛嘅當然係之鋒嘅女友錢詩文啦，話應該先打死毒蛇。之鋒即時回應話自己怕毒蛇，錢詩文話：「怕咩呀？你同蛇講我同你一樣咁毒，你以毒攻毒。」
一輪熱議過後，之鋒同八方講，最後佢都係冇答到呢條「趣味題」，因為實在唔知點回應好，亦都唔知對方問嚟做乜，似乎之鋒覺得呢條趣味題一啲都唔趣。
李八方
mailto:[email protected]