要老來有尊嚴，唔使住劍橋，原來起碼要五球。房協早幾日推出富貴長者屋計劃「雋悅」，入場費估計最少500萬，但畀咁多錢都只係買單位嘅租住權。後生仔又係時候計吓數，雋悅入住年齡60歲或以上，可以住到老死。一個大學畢業生，如果由23歲開始每月儲1.1萬，要儲足37年到60歲先夠500萬，都仲未計管理費、服務費、差餉、水費、電費同醫療費。
#劍橋床位月租九千
以香港打工仔月薪中位數約1.48萬元計，月儲1.1萬，即係得番3,800蚊使，（人工加時通常都係通脹，而加薪通常又係追唔上通脹），可能37年都要過咁嘅生活，到老先有機會「上樓」。
之前「贏在起跑線」嘅劉鳴煒教年輕人睇少啲戲，去少啲日本，月儲3,000蚊嚟買樓。費清諗諗吓，可能劉公子嘅意思唔係講買樓，而係叫人儲錢養老。
事關如果只係月儲3,000蚊，37年就先儲得個130幾萬，唔好彩捱到60歲仲隨時一身病痛，莫講話住雋悅，嗰百幾萬分分鐘連大埔劍橋護老院都住唔起。因為劍橋一個床位月費要9,000幾蚊，筆積蓄唔夠你住廿年。香港人均壽命有80幾歲，如果你80歲仍健在，到時都唔知點算喇。
費清
＃要生計，也要生活 ＃毋忘初衷