民主黨上周四通過凍結黃成智黨籍，不過中委會投票時候，有21票贊成，竟然有1票反對！好多民主黨同政圈中人事後都好奇，究竟民主黨首次嘅凍結黨員黨籍動議，邊個中委咁有特立獨行，自己走去投反對票呢？
有好事之徒係當日表決之後猜測，呢票反對票會唔會係曾經打電話畀黃成智、叫停袋住先聯署嘅「森哥」楊森、又或者係人都知嘅民主黨溫和派張文光呢？但據花生友打聽，其實張文光當日唔在場，而森哥係會上投咗支持票，即係呢一票唔關佢哋事喇！
徐漢光力排眾議
咁到底邊個到最後仍然力排眾議投反對票呢？花生友最近打聽到，原來呢位仁兄係2013年曾批評天安門母親運動發起人丁子霖患上「斯德哥爾摩症候群」、最後辭去支聯會常委兼道歉嘅徐漢光！據聞徐漢光喺會上話，黃成智係中委會表決前，已收回發動聯署決定，中委會冇理由再凍結佢黨籍。
有民主黨中人話，其實徐漢光過去一直屬黨內「溫和派」，早前已公開表示正發起聯署，要求召開黨大會，討論「除了企硬反對政府的假普選方案之外，本黨同時積極爭取政府方案作適當修訂，以『十分一出閘方案』落實普選」。
當時黃成智表明會參與聯署，徐、黃在政改立場同屬溫和，兩人相當啱channel，但係阿爺至今就政改堅持死牛一面頸，堅拒作出讓步下，相信溫和派只會繼續被阿爺和激進派「夾死」，嚟緊難有發圍空間。
花生友