【中環】早前杜汶澤話「香港電影會死，係因為你唔拍啫！發神經！」噚日朝早阿澤完成咗佢監製嘅三級江湖片《選老坐》煞科戲，戲中好多演員都有現身，包括王宗堯同黃德斌等，但就唔見黃秋生。前日香港大雨連場，天文台發出今年第一個黑色暴雨警告，但大雨過後，入夜氣溫相當悶熱，飾演黑社會大佬嘅阿澤，成晚要扮型着西裝，惟有趁未埋位時除低件褸，到佢拍先至着番。難怪阿澤噚日清晨返屋企沖涼，第一時間喺facebook貼相話要沖個熱水涼慶祝一下。
王宗堯濕身
前晚9點左右，阿澤先喺中環九如坊同大班臨時演員拍類似誓師大會嘅戲，現場所見都有成三、四十人，阿澤仲大叫：「鏟起佢哋個字頭！」成班兄弟就大叫「好」，氣勢都幾勁㗎！點知之後轉場去上環拍兩幫黑社會開片場面仲誇張，有成百幾位臨時演員，加上現場用大水喉做咗場人造雨，成班演員又要淋濕身認真辛苦，作為監製嘅阿澤就仲慘，成晚同導演邱禮濤騰嚟騰去睇到實，可能因為熱得滯，見佢未埋位都冇乜表情。至於喺戲中演黑社會嘅王宗堯、洪卓立、黃竣峰（前名黃集鋒）全部人都由頭濕到落腳，無一倖免。
扮同性戀大佬嘅王宗堯着住件紅色西裝褸開工，騷味極濃，鏡頭後佢攞住部手提電話周圍影，又同成班女仔匿埋食魷魚絲，收工之前要拍廝殺戲，記者都有埋去同佢做個訪問，佢就話：「都成身濕晒，等陣又要打㗎！」咁喺部戲入面使唔使死？王宗堯就大賣關子話：「人總要死一次嘅！」至於一向谷慣肌嘅黃竣峰就話：「今晚都谷咗一晚肌肉，以防凍親。」
採訪：藍文浩、梁繼光
攝影：沈健程、徐錦池
