民建聯鍾樹根噚日喺立法會大興問罪之師，唔開名質詢話康文署同某教育團體合辦嘅「中學生好書龍虎榜」，候選書目竟然有一本鼓吹極端及偏激政治思想嘅書，重話收到家長投訴擔心嗰本書會向中學生灌輸錯誤觀念。
鬧人鬧得咁婉轉，真係唔多似Tree Gun嘅敢言作風。其實佢講緊嘅團體就係教協，本書就只不過係國師陳雲本大作《香港城邦論II──光復本土》。唔通《城邦論》真係咁得人驚，提吓都有罪？
入選中學生好書榜
政府亦即刻同《城邦論》劃清界線，署理民政事務局局長許曉暉嘅書面答覆稱指出，呢個中學生好書龍虎榜嘅活動一直以來都係由教協負責所有統籌嘅工作，包括公開邀請推薦書籍、成立委員會以選出候選嘅書目、舉行中學生投票選出十本好書，同埋籌辦典禮活動等等。
康文署話佢哋尊重合辦團體，並無參與任何推薦以及選舉書目嘅工作，所以邊本書入選唔關政府事。
康文署又話，佢哋嘅嘅角色只係提供頒獎典禮場地及負責部份開支，並且安排獲選書籍喺部份圖書館巡迴展覽。康文署今年用喺中學生好書龍虎榜活動嘅開支只係35,000蚊。