保險界議員陳健波早前形容建制派不斷按掣否決泛民預算案修正案，猶如按「儍仔鐘」後，人力議員「大嚿」陳偉業噚日喺全部修正案被否決後，即不點名地向陳健波「還拖」，指發表「儍仔鐘」論的議員，「不只對自己侮辱，亦對議事堂侮辱」，炮轟「儍仔議員保駕護航」後，即遭建制派議員、工程界盧偉國投訴，盧邊指「無意對號入座」，邊指大嚿言論有冒犯性，要求曾鈺成裁決。
最終曾鈺成要求大嚿收回言論，大嚿就話願意收回，但係保留對自認按儍仔鐘的議員的批評，「佢話係儍仔鐘，咁按嗰個一定係儍仔啦」。
發表「儍仔鐘」言論陳健波聞言即發言，話對大嚿挑起事端「好憤怒」，「希望佢（大嚿）放下屠刀、立地成佛」喎。