第二場賽事四班泥地1650米，大熱門為莫雷拉其中一匹棄騎「自動導航」，不過這匹5倍大熱表現平平，反而雷神另一棄騎沈廄「競駿高飛」卻發揮出色，這匹5.5倍的第三熱門最終在梁家俊胯下，力拒轉彎蝕位甚多的「勁勇威龍」，取得在港首捷，後駒只跑獲亞，至於第三、四名，分別是「喜多屋」及「精彩生輝」。
沈集成要幾旺有幾旺，馬房近十戰九次有WIN。當中由五月九號開始到今晚為止，沈廐連六個賽日冇斷纜！講番「競駿高飛」田草連續近咗兩鋪，上仗由潘頓接手跑千六米放足三段試準咗，今勻佢停賽畀梁家俊冷手執隻熱煎堆，四歲馬易地初跑田泥一哩均速前置，走順咗之下就此力壓一對追兵「勁勇威龍」及「喜多屋」，梁家俊累積24WIN，亦告重新追近何澤堯，目前只落後三WIN，數字上仍有機會做今季首席華將。
「競駿」系馬每次上陣，例有吉祥物同打氣女郎在場助興，今晚亦唔例外，馬主競駿會有限公司苦戰大半季，終於打破今季齋缽，一眾馬主成員拉頭馬時笑得特別燦爛。至於因雷神受傷而臨時換鄭雨滇之「現代財星」跑落冇乜霸氣，次熱門僅以第七名衝線。