雖然有中港基金互認消息配合，但港股似乎未太受惠，噚日仲要跌成170點，可能啲資金仍然留喺內地炒作，搞到柯清輝日前大手增持至第二大股東嘅新灃（1223），噚日只升8.6%，多少令柯大俠嘅粉絲有啲失望。
其實新灃噚日一度創過52周新高，雖然收市升幅收窄，但以柯大俠每股成本價0.6元計，噚日收1元，即每股淨賺0.4元，總數計就賬面賺咗成1.5億元。不過呢筆都只係紙上財富，一日未離場都未定最終輸贏。
若用醫管局前主席胡定旭早前做先施錶行（444）聯席主席、候任機管局主席蘇澤光入股21控股（1003）嘅戰績比較，柯大俠今次做新灃第二大股東，迴響的確無咁大，記得當日隻21控股復牌首日曾爆升一倍。不過有朋友教華華咁睇，佢話柯大俠今次瞓身做第二大股東，故事應該唔會咁快完。