中國土豪有錢就是任性，密謀買起AV女優？噚日內地傳媒《鳳凰娛樂》報道，中國首富王健林旗下在A股上市的萬達院線，有意收購日本最大AV公司style，亦即係大家熟悉嘅S1公司，不過呢項消息原來係流料，《鳳》最終亦要刪除相關新聞，兼向萬達院線同一班網友道歉，總之就搞到一班中國網民非常失望。
不過都講講呢間AV公司，佢擁有多位知名AV女優，例如中國人尊稱為「蒼老師」嘅蒼井空、「翻版鄧麗欣」吉澤明步、癌病康復嘅麻美由真等等，可謂粒粒皆星。《鳳》報道引述「互聯網的那點事」嘅微博就話，萬達計劃收購該AV公司80%股份，令到唔少中國網民振奮，但知道消息唔屬實之後，佢哋都好失望咁講返句「蒼井空仍然屬於世界的」。
萬達院線自今個月13日起停牌至今，話係擬籌劃重大重組事項，停牌前報244.89元人民幣，股價年初至今已經升咗近7倍。至於平日言論相當出位、王健林的兒子王思聰，一於懶理，完全冇喺微博回應事件。查實萬達院線停牌以來傳聞多多，之前傳過收購金逸院線同藝恩網，但最後都否認。