唔少香港富豪都會向外國著名大學捐款，Panasonic嘅香港代理、即信興集團主席兼行政總裁蒙德揚（細蒙）最近就以蒙氏基金嘅名義，向英國劍橋大學西德尼蘇塞克斯學院（Sidney Sussex College）捐咗筆錢，翻新該學院其中一棟物業Sidney House，改建工程為學生提供更多宿舍房間。唔講唔知，原來Panasonic有個教育及慈善基金，而基金副主席就正正係廣播處前處長「大姐」張敏儀，今次同蒙德揚去英國出席典禮。
獲翻新嘅Sidney House過去逾140年租咗畀律師行，但因租約期滿，學院將律師樓改建成28間學生宿舍房間。蒙家似乎對劍橋大學有情意結。
父親曾獲命名建築物
蒙德揚嘅已故父親、「電飯煲大王」蒙民偉1996年捐咗150萬英鎊畀同一間學院，興建一幢多用途講學及會議廳大樓，獲命名為蒙民偉樓，係劍橋大學首幢以亞洲人命名嘅建築物。