阿爺辦事，喜歡出其不意，今個月繼母親節突然減息後，唔夠兩個禮拜，上周五收市後又忽然啟動中港基金互認，7月1日起正式實施，係繼QDII、滬港通後，第三條北水南下通道。兩地基金可互相收客，A股率先炒高，滬深兩市成交火爆，連續3日超過2萬億元人民幣，全宇宙最勁！港股氣勢不如人，投資者高追意欲低，今日期指結算，再考驗28000關，10日線27700見支持。
股市催化劑陸續有來。年初總理李克強話「應該有深港通」，就好似「神說要有光，就有了光」咁，中港兩地監管機構即開工，據講已敲定細節，將有超過1,000隻深圳A股納入深港通範圍，主要係主板和中小板股份；其中亦有創業板股份，但只容許專業投資者買賣。深證成份股指數已於上周三擴容，相信係為深港通部署。市場估計今季會有公佈，第四季正式推出。
又基金互認，又深港通吹風乜乜乜，利好消息浪接浪，固然對投資有利，但背後可能係經濟形勢相對市場預期有好大落差，阿爺先行為經濟鋪墊。國際指數公司巨頭富時（FTSE）前日突然搶先宣佈，將中國A股納入兩隻過渡性新興市場指數。另一巨頭摩根士丹利資本國際（MSCI），亦正研究將A股納入新興市場指數，「入摩」與否，香港時間6月10日揭盅。躋身FTSE和MSCI指數，代表A股真正踏上國際基金配置舞台，亦意味長遠將引入萬億資金。
華夏滬深夠穩陣
A股咁旺場，突破5000關指日可待。若果冇乜心水A股，不妨考慮A股ETF，例如南方A50（2822）、X安碩A50（2823）、華夏滬深300（3188）、海通滬深300（2811）、X標智滬深300（2827）等；有貨者可繼續持有並逢低吸納。我一向認為，投資組合總要有多少指數基金，無論係盈富基金（2800）、恒生H股ETF（2828），抑或A股ETF，都係順勢而行，當資金湧入買起大市，自然水漲船高，唔似揀股咁，有機會揀錯，雖然未必夠個股賺得多。
目前我偏好追蹤滬深300指數的ETF，相信深圳會係下一輪升市的火車頭，一來深圳具深港通概念，二來阿爺大力推動互聯網+，有利深證指數上揚，皆因深圳有較多創新科技股份，滬深300指數包含較多深圳股份。我打算待A股調整時吸納華夏滬深300，貪其屬實物ETF而非「X」字頭的非實物類，且交投較旺。不過，以華夏滬深300昨收報65.2元計，較資產淨值65.194元稍有溢價，一於等回調。
割柑人
本欄逢周四刊登