深圳上市的中超電纜上周六公佈，用1億元人民幣買咗28隻紫砂壺，畀股民鬧爆，斥之為不務正業，深交所亦表示關注。公司昨日補鑊，發公告話，啲紫砂壺為大師製作，物有所值。公司打算進軍互聯網文化產業，打造「壺聯網」，利用紫砂壺數碼防偽技術，為紫砂壺收藏家提供電子商務服務，所以係買得有道理。
近日內地流傳一宗笑話：話說有間空殼公司，走去收購公廁，進軍環保健康業，先炒一輪。廁所裝Wifi，等於有互聯網+，股價再上。由浙江一路收購到新疆，有埋一帶一路，廁所頂加塊光伏，變身新能源股。
廁所洗手盆龍頭加感應器，再轉成工業4.0概念股。蹲廁換馬桶，等於資產注入重組。炒到冇嘢炒，仲可以改名為「屁凸屁」，再炒一轉！而家中超電纜只係行咗第一步。
黃尹華