車路士領隊摩連奴又發揮「寸王」本色！佢度好晒啲稿，整埋動畫，喺星期二嘅晚宴上，寸爆曼聯、曼城同埋阿仙奴。唔知係咪寸得滯，激嬲啲同行嘞，摩佬失落LMA全年最佳領隊嘅獎項，個獎畀咗般尼茅夫嘅賀維。
禮拜二晚係車路士最佳球員頒獎禮嘅晚宴，做咗雙料英格蘭足球先生嘅夏薩特，就以大熱姿態拎埋隊友選出嘅車路士足球先生，同埋球迷選嘅車路士最佳球員，至於葛特蘇馬就拎咗最佳年輕球員。雖然夏薩特包攬兩個獎，但摩連奴一出，就搶盡風頭。
唔畀面恩師雲高爾
摩佬呢次嘅主題係車仔點解贏到冠軍？佢批評一支波衫全紅色嘅球隊，「足球場就有兩個龍門同埋一個波，但有支球隊唔係為咗入波。佢哋傳嚟傳去但傳唔到入龍門，之後就問國際足協呢種踢法可唔可行。國際足協當然話唔得啦，高控球比率點會等於贏波，所以就冇冠軍。」雖然有啲似寸緊阿仙奴，但睇番動畫入面嘅波衫顏色，相信中槍嘅係摩帥恩師雲高爾帶領嘅曼聯。
寸完曼聯，動畫就出現天藍色嘅波衫，摩佬就話：「仲有另一隊波，佢哋要求冇咁過份，只係要求球場只擺一個龍門。呢隊波係入到好多波，個個都識射波，同時佢哋冇失波，原因係佢哋唔會擺個龍門喺自己後場。國際足協就同佢哋講，唔好意思，畀唔到冠軍你哋喎，因為踢足球係要兩個龍門。」相信喺多倫多準備踢友賽嘅曼城領隊比歷連尼應該會狂打乞嚏嘞！
衰多口失最佳領隊
摩佬寸人又點少得阿仙奴領隊雲格，「第三隊離冠軍近啲，因為佢哋接受球場係有兩個龍門，但竟然問國際足協，可唔可以淨係喺一月到四月比賽？梗係話唔得啦，你一定要由八月踢到五月。因此，呢隊波都贏唔到冠軍。」喺下半季錄得八連勝嘅兵工廠中槍了。
最後摩佬就話有隊波肯守規則，踢波係為咗入波，同意放兩個龍門，肯由八月踢到五月，至多擺吓大巴，呢隊波就贏咗冠軍。佢當然係講緊車路士啦！可能係摩佬口太臭嘞，英格蘭足球聯賽領隊協會（LMA）唔將全年最佳領隊獎畀佢，畀咗今季帶領般尼茅夫贏英冠嘅賀維。
識睇，一定係睇足英台【英波Live】：
http://soccer.appledaily.com
http://bit.ly/engballlive