如果梁振英所講嘅六四紀念，年年都有，咁今年《基本法》頒佈25周年，香港人又真係唔覺有乜咁特別。難怪官方慶祝基本法頒佈25周年嘅活動，搞咗咁耐都冇乜人知。近排喺西環西寶城舉辦嘅「發現《基本法》」展覽終於有啲Noise，展品由香港知專設計學院嘅學生設計，不過八方見有人細心咀嚼，竟然感受到作品嘅弦外之音，反諷意味極濃。
馮家強：逃離唔到北京
多得教協總幹事馮家強喺facebook分享，否則八方錯過咗呢個由政府新聞處同知專學院合辦嘅展覽。眾多展品中，最震撼莫過於名為「香港大當家」嘅裝置藝術，一條巨型嘅立體鎖匙，插住香港地圖正中心，同學話咁係代表香港有權力管治香港。馮家強就同八方講，呢個設計只係令佢諗起李慧敏嘅名曲《你沒有好結果》嘅「一刀插入你心」，邊個要咁插香港？你懂的！
唔少作品其實想表達國家保護香港嘅意思，例如「國」字入面有個「家」字、「國旗碗」盛載印有香港區徽嘅紙船、「中國」二字，內藏「香港」二字，馮家強覺得作品想講，香港逃離唔到北京：「香港只能在中國的框框內活動，無法走出世界。」
有個學生就深刻描寫「行政長官」同「廉政公署」嘅關係，作品將兩者一大一細，一高一低，話想表達廉署負責將市民聲音講畀特首聽，但作品似乎想反映特首騎住廉署，仲要抵死到喺廉署旁邊加個聽筒，查實係咪想反映廉署負責收柯打替特首做嘢？可以到 http://www.discoverthebasiclaw.gov.hk睇睇，重溫呢批咁正斗嘅疑似反諷作品。
李八方
mailto:[email protected]
