過咗一個長周末嘅立法會特別忙，噚日晏晝兩點半一共有4個會要開，政改方案小組委員會、發展事務委員會，同埋兩個分別有關骨灰龕及成立保監局嘅法案委員會。建制、泛民都冧友之下，政改小組有60個委員，法定人數20人，兩點半會議室都係得3位議員，原來其他議員走去開骨灰龕同發展事務。身為骨灰龕主席嘅葉國謙惟有拖馬救政改，但都唔夠人，成班議員要周旋會議室之間。卒之到2點40分，政改小組先開得成會。建制派早知今日要兩頭走、當日又何必冧友？