曾經俾無綫力捧做主持嘅黎國輝（阿感），最近好似少咗曝光，噚日仲有周刊報道話大權在握嘅余詠珊，狂搵以前喺有線嘅自己友過檔，將舊臣子擺埋一邊，阿感就係其中一個。佢做完世界盃之後未有新job，喺半年前俾無綫通知約滿，點知發現仲差20個騷，會喺7月開新節目還騷。
噚日馮仁昭搵過阿感，身在台灣嘅阿感話：「未約滿呀，會先延長合約，準備開新節目。」阿感夜晚喺Ig貼咗張同余詠珊嘅合照，佢話大家喺台北撞見，坐低傾過偈，會將今日一字一句記低，努力開創新空間。
區永權：不覺分黨派
反而衞志豪、陸浩明同區永權三個「有線黨」去咗新城做訪問，講到佢哋被指逼走阿感，最初互相推搪唔敢答，最後由過檔無綫最耐嘅陸浩明開口：「以我所知Sandy姐（余詠珊）都好錫阿感，阿感係咪有第二啲發展呀？」
陸浩明三個仲賣口乖話大家都係TVB幫，陸浩明話：「珊姐係有幫我哋，畀咗我哋加入無綫嘅入場券，但係有啲job佢都阻止唔畀我哋做。」區永權話：「入咗嚟冇耐，黨派同埋堆都未感受到。」衞志豪就話𠵱家仲係適應中，機會有時要自己爭取。
撰文：馮仁昭
