放完大假嘅特首梁振英噚日出席行政會議，開會前例牌去示威區睇睇，自比「白宮發言人」嘅新聞統籌專員（IC）馮煒光，繼續變身攝影師幫梁振英影相，不過同傳媒唔同，馮生鍾意喺乜角度影就喺乜角度影，好似啲G4咁樣，圍住梁振英轉都得，但佢又有冇諗過自己變咗攝石人，擋住被迫留喺記者區嘅攝記呢？阻住攝記影相拍片即係阻人搵食，馮生阻住攝記鏡頭，攝記惟有好言相勸，點知佢屢勸不改，攝記們惟有大喝一聲「馮煒光」，點知馮生唔好老脾，反而叫攝記行埋一邊，事實係攝記已經被逼到埋角落。真係麻煩馮生畀番個位嚟影吓得唔得呢？