日本片《變態超人》大隻男星鈴木亮平，早前夥拍佐藤健嘅TBS新劇《天皇的主廚》，為演活病人角色花咗半年時間減磅，仲一減就減咗成45磅。話口未完，鈴木亮平又為主演新片《俺物語!!》有突破性演出，今次佢為翻拍自漫畫家河原和音嘅同名漫畫扮演擁有巨人身形嘅15歲高中生剛田猛男，鈴木亮平當扮完病人後，就由減磅瘦剩123磅狂食增磅，於短短40日就變咗個190磅嘅大肥仔，足足激增66磅。
呢套新片鐵定今年10月尾當地上映，鈴木亮平就同片中拍檔永野芽郁、坂口健太郎拍攝宣傳照，當佢抱起15歲女主角永野芽郁時可謂輕而易舉。
撰文：多雪花