今年六四雖然係26周年，又唔係逢五逢十嘅重要悼念日子，不過支聯會今年面對六四民主大遊行，同埋六四燭光集會，都唔敢太過掉以輕心，事關今年本土派力量係佢哋出現以來最大，好多支記中人都關心本土派支持者到時會唔會踩場，不過支聯會秘書李卓人同八方講，冇聽到消息、亦冇有怕，叫花生友放心喎！
事實上本土派今年睇住悼念六四活動睇得好實，除咗網上不斷叫人唔好去六四燭光集會，早排仲玩狙擊，公開一啲叫人參加悼念六四活動嘅網站，仲有個別網民話要去踩場，點醒班大中華膠，難怪有班年年去六四嘅泛民後生仔，擔心本土派會到場玩嘢，「你知班本土友冇組織，個別人自己走去踩場玩嘢，冇人會叫得停！」
花生友年年去六四燭光集會，梗係唔想有啲咁嘢發生，於是好擔心咁走去問李卓人，睇睇支記有冇準備，點知阿人同花生友話：「冇喎！冇乜特別安排同準備喎！」阿人同花生友講，不論係六四民主大遊行，定六四燭光集會，佢哋同警方開會時，警方冇話有本土派人士同時申請集會，就算到時有個別本土派人士走去踩場玩嘢，阿人話冇有怕，「佢有佢哋搞，我有我哋搞，大家各有各搞，冇事嘅」。阿人又話，因為立會拉布，所以今年立會六四辯論又「斷纜」，又要係6月3日，喺立會外面搞平反六四辯論同集會，希望再呼籲市民踴躍參加燭光集會悼念六四。
花生友