【專題籽：舖仔小店】
左看是汽水大啤香煙零食，右望是夢想創意設計藝術，一間士多，兩種風景，看似性格分裂，其實一脈相承。李老闆在灣仔星街經營的利記士多，一年前被女兒Karen及一眾本地設計師「入侵」，尋常士多兼售視覺衝擊，還送滿腦問號。兩代情在小小的空間靜靜發酵，雖然二人說話不多，卻跟陌生人雞啄唔斷，親情嘅嘢，就係咁怪，怪過這間士多一萬倍。
二分一乘以二分一，居然變成無限。店面雖窄，視野卻是無比廣闊。這天，我先與開籠雀一號——李老闆閒聊，他說話慢、頭腦快，一開始，還擺出一副拒人於千里的惡相，但不消一會，他便跟你風花雪月搞爛gag。利記士多由他母親開設，在灣仔永豐街經營近三十年，後來由於該處被地產商看中，約六年前搬到星街現址。上一代的人總希望把家業傳下去，只是想不到如今自己也與女兒一起顧店，「就當係觀察，有時佢手腳慢，我都會嬲，但其實佢唔係慢，係太投入。」
辛苦供女兒到英國讀設計，回來卻說想借用半邊士多，她在搞甚麼，最初他也不曉得。「佢話英國都係咁，呢邊煎熱狗，嗰邊就賣嘢。聽佢講完，我好似上咗一課，去咗外國讀書一樣。」他曾想過把雪櫃撤走、把魚缸搬回家，讓女兒有更多空間。「驚佢緊張，但唔想用自己嘅經驗叫佢做嘢，佢肯定會抗拒。𠵱家未死得，是但啦！」口說不擔心，但每每站在女兒角度設想。「佢係積極分子，但積極分子冇成果嘅話會大鑊。」希望她會腦輕鬆，自己卻從不放鬆。
阿爸：令個世界刺眼啲
Karen為店舖引進了十多個設計師品牌，另兼賣她在上海及泰國搜羅的vintage服飾。李老闆說：「有啲人入嚟第一句就問『啲衫係咪舊？』佢哋嘅說話令我擔憂，人哋喺外國，見到呢啲嘢，好似熊人攬蜜糖咁當寶。」有人走進來，買一張十多元的明信片，他可以樂上半天，「唔係錢嘅問題，感覺同他有共鳴。」近來手作市集遍地開花，手作人及設計師的出頭機會多了。「市集多，但槓桿始終唔大，嗰班生性嘅，朝早有份工，放工再做創作，好辛苦。我都好欣慰，見到佢哋咁努力，差點想用埋對腳嚟拍掌。」鬼馬的他思想跳脫，總是適時放個笑彈，令人歡樂。
經營舊舖時，他開得早收得遲，現在年紀大了，這兩年寧願隨心而行。「都會睇埋《大時代》先走，彈性上班時間，有時發脾氣就走入新界踩單車。」就是喜歡小店有性格，不似連鎖店千篇一律，有準則無驚喜。他一直強調自己「都好呢啲嘢」，那麼有想過自己創作嗎？「買部3D打印機，大把嘢玩，希望做啲嘢出嚟令個世界刺眼啲。冇理由全世界都係Hello Kitty嘛，睇見就憎，又要即刻睇係咪水貨假貨。買設計唔使睇真定假，只睇靚唔靚。」世事都給他看透了。Karen說藝術細胞遺傳自他，我信。
阿女：有個發夢嘅地方
訪問爸爸翌日，我找到開籠雀二號——Karen。士多不只賣他人創作，還有她與友人在大嶼山開設的藍染工房「片藍造」的出品，如tote bag及筆袋等。開班生產宣傳行政一腳踢，還要做士多的宣傳，她日日做到冇停手。
她在英國讀設計的畢業作品是「如何重新塑造一個固有空間」，對象就是爸爸的士多。構思時天馬行空，希望定期搞裝置展覽，也有空間讓人坐下看書，但最重要是推新也要保舊。「傳統嘅嘢一定要留落嚟，咁樣對比先強烈。」士多仍然是士多，只是同時提供平台，讓香港設計師（及她自己）有個發夢的地方。她說走進來的人，十個有八個會說為甚麼這邊賣飲品，那邊有這麼多有趣的東西。賣設計就是要出奇不意，估你唔到，勾起好奇，其實已成功了一半。
做拍檔 進步源於磨擦
「正因呢度空間細，只能嚴選自己真係鍾意、高質嘅嘢。」寧缺勿濫是她的入貨準則，士多賣手作即使不能賺甚麼錢，仍有堅持有態度，但這也是她與爸爸最初有爭拗的原因。「有啲客人走入嚟問有冇折，可唔可以平啲，他就話好呀，可以減價。我好執着，覺得人哋用咁多心機時間先做出嚟，畀呢個價錢，係一份尊重。」
跟同事會客氣一點，對親人總是把最真一面掏出來，即使是兩父女，成為生意夥伴，也需要磨合。爸爸再次金句王上身：「如果冇磨擦，點會有進步。如果冇磨擦，我們可能仲坐緊Toyota牛或者Suzuki牛咋，而唔係坐車！」笑問爸爸最想跟女兒說甚麼，他想了半秒，露出蠱惑的模樣，「快點賺錢，快點交租！」我追問，她沒交過？他說：「這是秘密，我要去保險箱拿出來才能答你。」轉告Karen，她笑到彎腰：「我冇所謂，如果佢要，我會畀。」爸爸四両撥千斤，耍走了深情剖白機會。Karen當然耍唔甩。「講多謝好老土吧！我會同佢講我會做出成績，有個交代。我會活得好好。」 好不容易，拉他二人企定定傾偈，他倆竟然尷尷尬尬。這個理論多多的思想家爸爸，不斷被阿女搶白，我肯定，他故意輸，寧願默默當她背後的男人。
利記士多
灣仔星街2A號星月閣N號地鋪
部份圖片由受訪者提供
記者：葉青霞
攝影：鄧鴻欣
編輯：陳國棟
美術：房 雍