作為榜首練馬師，大摩當然係勤力之人，但勤力還勤力，總要回吓氣，一般嚟講大摩周二會較hea少露面，尤其今朝（26日）佢冇馬試閘，就算不在家休息，亦多數留喺馬房。但今朝好奇怪，大摩突然罕見現身並好積極，究竟有乜任務呢？
原來黑衣巨人「步步友」由雷神拍跳，呢匹準馬王地位高，又即將起程遠征英國，難怪請得郁大摩，令佢犧牲休息時間，喺周二出嚟睇馬。操完仲好特別，大摩居然親自拉「步步友」到一角，定企企畀疑似係記者嘅外藉人士影相。
其實大摩唔止睇「步步友」，今朝佢好緊張一匹周三戰馬「和諧氣氛」，隻馬喺機坪踱步時，大摩金睛火眼吼到實，有晒搏殺手影。「和諧氣氛」上仗首次上名，於泥地一哩後上第二，三歲馬明顯有進步，今次跑1800米更利追趕。
睇番大摩、雷神近兩季喺各場地嘅1800米賽事共合作16次，獲10冠1亞3季1殿1第五，勝出率咁高，睇怕今次「和諧氣氛」就算跑第二佢哋都唔開心呀！