本港八間公立大學八位校長之中，除港大馬斐森係英國人，城大郭位係台灣人之外，其他六位都係本地人，中大沈祖堯係皇仁，港大畢業；科大陳繁昌係皇仁預科生，美國回歸派；理大唐偉章係基教書院畢業，美國回歸派；即將離任嘅浸大陳新滋，曾考入中大，後來去咗日本讀大學，嶺大鄭國漢係中大經濟系校友（聯合書院），教育學院張仁良係中大數學系校友（聯合）。
幾年前理大唐校長初上任時，東亞銀行前行政總裁彭玉榮請佢吃飯，席間講起邊間中學畢業，唐校長話：「你地或者未聽過，係基教書院。」點知彭總與左丁山立即記得該校位於尖沙嘴赫德道，唐校長笑曰：「證明你地年紀有咁上下！」或者係嘅，不過彭總立即講到自己係威靈頓書院出身，校友有林煥光、黃玉山（現公開大學校長），佢地問左丁山讀甚麼名校，哈哈，打籃球就係名校，贏過校際女皇盃嘅九龍總商會英文中學，彭兄當日立即舉杯話：「莫問出處！三間學校今天已經執咗。」有保留啫，佢兩位先至係英雄莫問出處，彭兄係銀行界通識專家，冇嘢可以難到佢，連電影「北非諜影」裏堪富利保嘉與英格烈褒曼之深入關係都有研究，與李歐梵教授吃午飯時講及呢套電影，左丁山無法插嘴，後來彭兄仲將「北非諜影」劇本交俾左丁山送予李教授，至於唐校長係柏克萊博士，國際知名學者，左丁山之三腳貓，相差太遠了。
大學之中，似乎科技大學盛產校長，前嶺大校長陳玉樹（中大崇基經濟系校友）曾是科大商學院院長、副校長，現任嶺大校長鄭國漢之前是科大商學院院長，特區政府庫務局及財經事務局局長陳家強做唔成（自動退選）城大校長之後，俾曾蔭權招攬咗入政府，梁振英上台，陳家強繼續留任，錢大康就任浸大校長，就會成為第五位科大高層出任大學校長，因為前城大校長張信剛及公開大學校長黃玉山亦係來自科大㗎。其中或有一個原因，上述各位科大學者既有資格做校長，亦有意志肯做校長，肯唔肯做，好重要，試過有獵頭公司問左丁山推介一兩位合適大學校長人選，左丁山問過一啲相熟嘅中大教授，佢地都唔願意走入熱廚房！