雖然澳門賭業正吹淡風，但銀娛（027）主席呂志和繼續去馬，旗下澳門銀河二期與澳門百老匯今日齊開張大吉。華華噚日率先過大海參觀新賭場，賭場地方大，有兩間酒店，非博彩設施當中，較新鮮係一條長575米嘅空中激流。
新場令銀娛渡假城嘅規模增加一倍，去到110萬平方米，另外得到政府批准新增150張賭枱。
澳門銀河二期又引入JW萬豪與麗思卡爾頓兩間五星級酒店負責管理千多間客房。麗思卡爾頓繼續採用「空中酒店」風格，銀河二期51樓以上歸佢管理，以下就由JW萬豪負責。
雖然新場酒店客房多，不過暫未見好多新奇玩意，最新穎應該係一條長575米嘅空中激流。玩家要預咗遇到巨浪、被噴水，其至被兜口兜面淋水等機關。不過，呂志和應該想有大客拎大叠大叠銀紙拎去賭枱多啲喇。
