費清同你分享一個「13億人都震驚了」嘅秘技，就係「食極唔停瘦身法」。唔好笑住，費清講真㗎。THEi工商及酒店旅遊管理學院特任導師何文傑，就係人辦。佢曾經用呢個秘技，再配合適量運動，就喺12星期減咗25磅。
佢話，首先將一日3餐分拆成6至8餐；然後每餐食大量蔬菜等高纖維食物；再配以適量白肉，並將主食（集中早、午兩餐，晚餐可慳番），由高熱量嘅公仔麵或高GI（Glycemic index，升糖指數）嘅白飯，改為適量意粉或糙米；選擇低GI水果（一日3至5份好喇），如橙、蘋果，取代GI值較高嘅西瓜、蜜瓜或香蕉等。
所謂GI係衡量進食含有碳水化合物食物後，影響血糖上升嘅指數。高GI食物會被快速消化同吸收，令血糖、胰島素急升，繼而因血糖過多，加快轉化成脂肪同埋貯存速度。
低GI嘅包括糙米、意粉、橙、蘋果、黃豆等。高GI就有白飯、白麵包、饅頭、西瓜、荔枝和龍眼等。
何文傑話，每1.5至2小時進食，即係少食多餐，等身體「忙個不停」，可以令基礎新陳代謝率大大提升。唔好睇小「代謝率提升」，如果一星期持之以恒，成果可能遠超過偶然一次去健身室喪跑2個鐘㗎！
費清 ＃要生計，也要生活 ＃毋忘初衷