【金鐘】甘比為劉鑾雄（大劉）誕下一對子女後，雖然未有任何名份，但得寵指數極高，經常貼身陪伴大劉出入。不過，甘比閒時亦會親力親為照顧一對子女，上周五（22日）下午接6歲女兒劉秀樺放學後，甘比便由兩名保鑣陪同下，帶女兒到金鐘太古廣場行街兼食雪糕，𠱁得當日仍未換校服的秀樺，全程開心紮紮跳。
當日大約下午4時左右，甘比抵達太古廣場後，即拖着囡囡秀樺前往Great Food Hall的雪糕店i-Scream Gelato，不只一次被影到在那裏購買雪糕的甘比，跟以往一樣買了最愛的朱古力味雪糕，女兒秀樺則揀了芒果味及綠茶味。
秀樺等候雪糕期間興奮得紮紮跳，又自轉扮跳芭蕾舞，十分搞笑。之後兩母女邊行邊食，在廣場內兜了一個圈後，甘比再帶女兒到朱古力專賣店買朱古力，離開時甘比發現記者拍照，便拖秀樺急急腳走人，不過秀樺在等車期間又舞癮大發，拖着甘比的手不停自轉，可能怕囡囡轉到頭暈，甘比索性抱着秀樺等司機，最後坐「1 LOVE YOU」座駕返回大宅。
阿Yu湊女玩機動遊戲
另外，去年跟周永恒正式分居，現在母兼父職的趙頌茹（Yu），前日下午約4時左右，由一位女友人陪同下，帶着兩個囡囡信希及愛希到紅磡黃埔花園冒險樂園，玩機動遊戲海盜船。
當日素顏出動的Yu相當忙碌，除了陪玩陪食之外，趁友人陪兩囡囡玩波波池，她便到附近服裝連鎖店H&M幫兩女買泳衣及帽仔，買完更即時幫女兒試戴，大女信希見有新帽仔就開心笑晒，而細女愛希由於玩了一個下午，待Yu與友人吃壽司時已攰到瞓着，Yu便抱着她與大女及友人乘的士返家。
採訪、攝影：梁繼光、朱志聰、吳耀輝
