香港建築師學會噚日頒發2014年年獎，著名建築師嚴迅奇（圖）帶領嘅團隊同政府建築署憑添馬艦政總工程攞到境內優異獎（社區建築），曾經接受訪問話對公民廣場加建圍欄感到失望嘅嚴迅奇突然改口，話圍欄冇影響原有設計，認為保安程度因應社會氣氛可鬆可緊，仲話公民廣場一路都要申請咗先集會啦。
屬嚴迅奇團隊嘅建築師譚偉霖喺台上介紹作品時大談「門常開」理念，話代表開放同包容等社會價值，可以俾人集會聚會，不過被問到公民廣場加建圍欄係咪偏離建築原意時，譚偉霖即時封口，只係好隱晦咁話部份設計意念「已經成為回憶同期盼」。
嚴迅奇嘅團隊亦都憑雲南省博物館新館攞到全年境外建築大獎，最特別係鋁合金外牆響唔同天氣下識變色，陰天就啡紅色，陽光下就變成金色，呢個建築方法係佢哋首次試用。