【亞視倒數之日久失修】後日便是亞視58周年台慶，但由於亞視將不獲續牌，經營至明年4月1日便玩完，這個最後的台慶，亞視沒有大肆慶祝，但當晚會播出昨日錄影的特備節目《亞視光輝歲月》給觀眾緬懷一番。亞視昨傾巢安排藝人撐場，連舊將陳靖允都要碌卡出動，不過活動開始前，陳靖允往地下女廁方便時，突然發生石屎倒塌，幸好她避過一劫。
「當時我去緊」
陳靖允表示當時正在如廁，天花板突然有一幅約1米的石屎墮下，幸好只跌落踎廁廁格內，地上佈滿石屎，一片混亂，陳靖允慶幸逃過大難，沒有受傷，猶有餘悸的她接受訪問時說：「好彩我用坐廁唔係踎廁，當時我去緊，今朝落過黑雨，以為行雷，點知連續咁大聲就驚，事後又一直冇人聲。」避過一劫會否買六合彩？她說：「唔使，都冇乜嘢事，意外啫。」
事發後，亞視保安立即圍封女廁現場善後，亞視執董葉家寶說：「可能因為天雨，又日久欠巡查，幸好冇人受傷。已經叫咗行政科同事加緊巡查，希望唔會再發生類似事件，保障員工同賓客安全好緊要，同時會盡快搵人修理。」其實亞視早前也發生「斷水斷電」事件，曾向中電要求寬限交電費一周，昨日再發生事故，認真禍不單行。
就女廁發生塌石屎事件，黃日華說：「女廁唔關我事，我入唔到去，可能暴雨搞到咁都唔出奇，漏水事件就多，（石屎）跌得落嚟都好誇張。出年換logo第二間公司用，呢度都要執企理啲。」
張文慈自爆平日也慣用這個女廁：「我今日用咗另一個，睇新聞啲相好嚴重，好彩冇遇到。」她也有留意吳志雄傳內地被打事件，經常到內地登台的她有感而發：「我試過被人從後攬掂到重要部位，為咗搵食冇辦法，我事後喊咗。我又聽過有女星俾人遞杯嘢上台叫佢飲，落咗台要去醫院洗胃，我堅持唔飲，最多作狀飲。」
採訪：藍文浩
攝影：陳慧安
